واه واه شیخه! - ۳۴

واه واه شیخه! - ۳۴

طنز- محمود نظري

له هغه بیزو چې ځان انسان بولي تښته!

له هغه بسلمانه چې ځان مسلمان بولي تښته!

هیواد کې بې قانوني د ځانمني اساس جوړوي

له هغه غلامه چې ځان سلطان بولي تښته!

***

پرون چې غله وه له برکته یې پیسې هم ډیري وې

هرچا ته د غلا لارې چارې او نخرې هم ډیري وې

هر چا ته د هغه د کسب په اساس روزي رسیږي!

شیخ سره وړیا ټوک وېشل او فتواوي هم ډیري سوې

ټوک ( د ډوډۍ ټوکړه طالب ته ورکول)

***

علم نادان ته د هغو پټ جهالت ښيي

هغو ته د دین او دنیا دهوا حالت ښیي

اصلی علم د عصر دی چې دین یې فرض بولي

دا د علم مباح بلل د دین د نادانانو ذلت ښيي

***

سپین پټو له غوږو لیري کړه، څوک یې ته؟!

مور په شیطان پلورې د چا تارتوک یې ته؟

د دنیا په ګټه عقبا خرابوې رښتیا بسلمان یې ته؟

شیخه! د بل په غمزه نامیخدا ریوک يي ته

ریوک ( چالاک)، غمزه( په سترګو اشاره)

***

د دنیاوالو یوم البهتر دی، زموږ د شیخانو لا یوم البدتر

موږ ځان ته خپله جوړکړی دی تر کافرانو لا یوم البدتر

له ناداني د بل په ناړو خپل برېتونه تاو وو او ګرځو

د سرکس خره لا عصري سول موږ یو تر هغو لا یوم البدتر

***